Thursday, January 20, 2005

آپارما سئل آماندي- اسد نيظام



مּحּ شهريار´ين "حئيدر بابايا سلام" اثرىنين ايزلرى

پروانه محممدلي- فيلولوگييا علملري نامزدي.

بيلديييميز كيمي ايراندا آذربايجان شاعيرلري ضروري ائحتيياج اوزوندن اوزون موددت فارسجا يازماق مجبورييتينده قالميشلار. بو ديلده يازيب صنعت زيروه‎سينه چاتانلار دا اولموشدور. لاكين سونرالار اؤز كؤكونه قاييديب ميللي ثروت‎لرينه ديه ر وئرن ضييالي‎لار دا آز اولماميشدير. اونلاردان بيرى ‎ده آذربايجانين اؤلمز شاعيري محممد حوسئين شهريار ايدي.

شاه ايستيبدادي دؤورونده آذربايجان توركجه‎سينين اولوم- اؤلومله چارپيشيب و بو ديلين جيددي ادبي ايفاده واسيطه‎سي اولابيله‎جه‎يي شوبهه آلتيندا اولدوغو بير واخت٬ گؤزله نيلمه‎دن يازيلميش و هامي طرفيندن صنعت اينجي‎سي كيمي قييمت‎له نديريلميش بير پوئزيا نومونه ‎سي مئيدانا چيخير. عنعنوي فارس شئعرينين اوستادي ساييلان شهريار اؤز ادبي ايستيقامتيني دييشه‎رك شيرين تورك ديلينده حئيدربابايا سلام كيمي چوخ قييمتلي بير اثر يازير. ديلين ميللي صافليغيني ساخلاماقلا شيفاهي خالق شئعري اوسلوبوندا يازيلميش بو اثر٬ ايلك گوندن بؤيوك ماراغا سبب اولوب، تورك ديلين آسيميلياسييايا قارشي موقاويمتيني گوجلو صورتده نوماييش ائتديريردي.

شهريار´ا قده ر ميللي شئعر عنعنه‎ميز ايران آذربايجاني´ندا يازيلي ادبيياتين آپاريجي ايستيقامتينه چئوريله بيلميردي. شهريار´ين حئيدربابايا سلام و دوغما ديلينده يازديغي باشقا شئعرلري ميللي ادبيياتين، ميللي دوشونجه‎نين اينتيباهينا سبب اولدو. شهريار´ين آناديلينده يازديغي اثرلر همده ميللي ديلده مطبوعاتين يارانماسينا تكان وئردي حئيدربابايا سلام ياراديجي گنج‎لرده يوردا اولان محببتي بو اثرين كؤمه يي‎ايله اونلاردا تورك ديلينده يازماق مئيلي‎ني گوجله نديردي. بو اثردن سونرا شاعيرلر طرفيندن ساوالان، بوزقوش، ميشوو، قازان كؤشك، پيركوزن، قافلانتي و بير چوخ باشقا داغلارين آدي دا پوئتيك فورمالاردا سسله ندي. حئيدربابا ايسه داغلار باباسي اولدو.

حئيدربابايا سلام اثرينده بيز خالق ياراديجيليغينين نومونه لرينه چوخ راست گليريك. بونونلا باغلي كانكرئت بير فاكتي گتيرمك اولار. عصرين اووللرينده بير ائل عاشيغي طرفيندن يازيلميش بير شئعرين خوصوصييت‎لري بيزه حئيدربابايا سلام اثريني خاطيرلاتدي. اثر ايران آذربايجانىنين ساوه ويلايتينده ياشايان شاعير اسد نيظام طرفيندن يازيلميشدير. بوباره‎ده بيز رحمتليك علي‎بن كمالىنين 80-جي ايللرده تئهراندا چاپ ائديله ن وارليق درگي‎سينده‎كي سيلسيله يازيلاريندان بيرينده راست گلديك. آپارما سئل آماندي آدلي بو شئعر شهريار´ين اؤلمز اثري حئيدربابايا سلام پوئماسي‎ايله چوخ اوزلاشير. هر ايكي شئعرده اوخشار جهت‎لر چوخدور. فرقلر يالنيز شئعرلرين يازيلما تاريخي و مضمونلاريندادير.

اسد نيظام بو شئعريني 1900-جي ايلده يازيلميشدير. اثرين ائله آديندان گؤرونور كي، او بدبين، تراگيك روحدا يازيلميشدير، اونو دا قئيد ائده ك‎كي، قفيل گلن سئل اونون جاودان قوهوملاريني گؤتوروب آپارير. بوندان تأثيرله نن شاعير بير فاجيعه پوئماسي يازير. چوخ ماراقلي‎دير كي، اوستاد شهريار دا مشهور حئيدربابايا سلام شئعريني بو سبكيده يازميشدير. حئيدربابايا سلام اثرينده آنا يورددا كئچه ن گونلرين ناستولژي حسرتي دويولورسا، آدي چكيله ن اثرده يايلاقدا قفيل سئل‎دن بير گؤز قيرپيميندا ويران قالان يوردون موصيبت ‎لريندن دانيشيلير.

اسد نيظام اؤزو خان نسليندن اولسا دا، هميشه حاق، عدالت طرفداري اولوب، خالقا ظولم ائده نلره قارشي چيخيب، ائله بونا گؤره‎ده خالق اونو اؤزونه باشچي-ائلخاني سئچيب. سونرالار اونون بو وظيفه‎سي رسمي اولاراق دؤولت طرفيندن ‎ده تانينير. بدبخت‎ليكدن سونرالار اسد نيظام´ين اؤزونون ياشاديغي، 12مين ائوي احاطه ائدن يوردا برك سئل گلير. كؤرپه اوغلونو خيلاص ائتمك ايسته ين ائل شاعيرينين اؤزونو ده سئل آپارير، سئل آپاردي آدلي پوئماسي بوگونه قده ر ساوه ويلايتينين خرقان بؤلگه‎سينده، اؤزه لليكله اسد نيظام´ين منسوب اولدوغو گلوند طايفاسيندا ديللر ازبري و اوره ك دردلريني گؤسته ره ن علمه چئوريلميشدير. اسد نيظام بو پوئمادا بوتون دويغولاريني داها طبيعي و رئال وئرمك اوچون خالق آراسيندا ايشله ديلن ايفاده لردن، دئييملردن، آغيتلاردان ايستيفاده ائتميشدير.

قارا بولوت گؤي اوزونو توتوبدور
هئچ بيلمـه‎ نم بختيم نـدن ياتـيبديـر
چرخ-ي فلك قوللاريمي چاتيبدير.
آرالان بولـوت ، آرالان بولـوت
باشيميز اوستونده قارالان بولوت.

چاديري قورموشدوم دري-درينده
مـن بير چيــراغ ايـديـم او گـلونــد´ه
قـيـرخ بدوو اتلاريم قـالدي چمـنده
آپارمـا سـئل ، آپارما سـئل آمـاندي
اكبرخان ، عسگرخان منلن ياماندي

ائلي طرفيندن ائلخاني سئچيله ن اسد نيظام ائلين داوارينين بئله ياد اؤلكه طرفيندن ساغيلماسينا ائعتيناسيز قالمير.

خـراب اولسـون وئيس آبـاد´ين دره سـي
دؤرد ‎يانيندان سئل گلير اولمور چاره‎ سي
اســد نـيـظام ايــــديـــم ائللر اييه سـي
بــونــدان ســونـرا دودمــانيــم داغيـليـر
ائل قـويـونـو، يــاد اؤلــكه‎ده ســاغيليــر

يقين كي، اسد نيظام´ين بو شئعري شهريار´ين ياراديجيليغيني داها دريندن اؤيره نمك و اونو ياخشي منيمسه مك اوچون گره كلي اولاجاقدير. اؤرنك گتيرديييميز بو شئعرين تيمثاليندا شيفاهي خالق ادبيياتينين، ائل عاشيق‎لارينين و شاعيرلرينين شهريار صنعتينده كي ايزلرينين داها بير نومونه‎سينه راست گلديك.

1 Comments:

Blogger irankabir said...

نفرین بر خران قاجاریه که قسمت بزرگی از ایران زمین استانهای گرجستان داغستان ارمنستان و بخشی از آذربایجان را به زرد کله روس فروختند. و نفرین بر جیره خواران زرد کله های آمریکایی که امروز به جای فکر کردن برای بازگشت استانهای از وطن جدا شده در جستجوی مدرک سازی و هرج و مرج خواهی در راستای منافع بیگانه قدم بر میدارند.
تاریخ جز ننگ چیزی دیگری از آنان یاد نخواهد کرد.

10:12 AM  

Post a Comment

<< Home