Thursday, December 01, 2005



شاهسون اوزاني علي‌حسيني ايله موصاحيبه
http://shahseven.blogfa.com/

موصاحيبه آپاران: سيد حيدر بيات
حسين علي حسيني 1349ه.ش ساوه‌نين عابباس‌آباد منطقه‌سي‌نين صالح‌آباد كندينده دونيايا گؤز آچيبدير. اوشاغليق دؤوره‌لرينده بالابان و سونرا چؤگور چالماغا باشلاييبدير. بالاباني قارداشي اكبر علي‌حسيني و چؤگورو اوستاد علي رمضاني و آيري اوستادلارين يانيندا اويره‌نيب‌دير. اون بئش ياشيندان موختليف توي مراسملري و مذهبي بايراملاردا بالابان و چوگور چاليبدير. سونرالار سورنا چالماغي 1370_ده شاهسون هنرمندي ابوالفضل راستگو يانيندا اؤيره‌نيبدير. آقاي علي حسيني شاهسون موسيقي‌سي‌نين تانيتديرماغا چوخ چاليشيبدير و
«انجمن صنفي موسيقي ايران» و «خانه موسيقي» و «انجمن سرود و آهنگهاي انقلابي»نين عضوي ساييلير و انجمن سرود و آهنگهاي انقلابي‌ده محلي موسيقي‌نين مسئولو سئچيليبدير. علي‌حسيني كئچن ايكي ايلده قوم مركزي صدا و سيماسيندا چوخلو وئريش(برنامه)لري اولموش و شاهسونين اصيل موسيقي‌سين اجرا ائديبدير. علي حسيني قومدا شاهسون هنرمند و عاشيقلارين بيمه اولماسينا چوخلو زحمت‌لر چكيب و ايندي بو هنرمندلرين بيمه اولماسي ايرانين موسيقي ائوي(خانه موسيقي ايران) طريقي ايله تحقق تاپير. علي‌حسيني ايله بير كيچيك مصاحبه ائتميشيك كه خدمتينيزه تقديم اولونور:
بيات: آقاي علي‌حسيني بو گونلر نه ايش گؤرورسوز؟
علي‌حسيني: رسمي و فرهنگي نهادلارين طريقي ايله مراسملره برنامه تهيه ائديريك و چاليشيريق كي شاهسون موسيقي گروهلاريني (انجمن سرود و آهنگهاي انقلابي)يه گؤنده‌ره‌ك.
اؤز هنري ايشلريز بو گونلر نه دير؟
بير گروه تشكيل وئريليب شاهسون هالايلارين اجراء ائده‌ك. بو ايشين بانيسي شباهنگ استريوسودور هالاي بير نوع رقص‌دير كي شاهسون‌لرين و همدان توركلري‌نين ايچينده بيرليكده ياني دسته جمعي اجرا اولونار.
بير آيري ايشيمده قديمي فراموش اولموش و اونودولموش آهنگلري قوجالارين سينه‌سينده‌ن ائشيديب اونلاري يئني‌ده‌ن اجرا ائديره‌م.
بيات: بو هاوالارين آدي نه‌دير؟
علي‌حسيني: يورغون، كلكي، كؤسه لر، يورد هاواسي، كوچ هاواسي، لولم هوي هاواسي، دوه زنگي هاواسي ، يول هاواسي، قيز ننه‌ي اولسون و....
بيات: نئچه سي اجرا اولونوب؟
علي‌حسيني: بونلارين چوخو اجرا اولوبدور.
بيات: شاهسون موسيقي‌سي بوگون نه دورومدادير؟
علي حسيني: شاهسون موسيقي سي تقريبا بو بئش آلتي ايلده بير آز ضعيف اولوب. تويلاردا و مراسيملرده پاپ موسيقي‌سي نفوذ ائديب دير. و اؤز عاشيق‌لاريميز هرده‌ن آذري، توركيه و حتي فارس موسيقي‌سي چاليرلار.
بيات: شاهسون موسيقي‌سي‌نين بو بحراندان چيخماغينا نه اؤنر و پيشنهاد واريزدير؟
علي‌حسيني: بيزيم بو گون شاعير و آهنگساز يوخوموزدور. يعني بيزيم عاشيقلاريميز آرخاسيز و پشتوانه‌سيز قاليرلار. موسيقي نهادلاري شاهسون موسيقي‌سي حاقدا تحقيق آپارميرلار البته بونون تقصيري‌نين چوخ پايي اؤزوموزده‌دير. من شاهسونين هنرمند جاوانلاريندان ايستيره‌م كه اؤز تاريخ و فرهنگ و موسيقي و شعرلرينه آرتيق اؤرك يانديرسينلار. بيزيم فرهنگيميزين قالماقي و داوامي بوگون اونلارين اللرينده‌دير.
بيات: سون سوز؟
علي‌حسيني: من شاهسون فرهنگينده زحمت چكن قارداشلار مخصوصا اوستاد علي رمضاني، داوود توركمن شباهنگ استريوسونون مديري و عاشيق مسيحا و ... تشكر ائديره‌م.

0 Comments:

Post a Comment

<< Home