Sunday, July 23, 2006



ائی منیم آلینماز قالام تئلیم‌خان
گلمیشه م یانیندا قالام تئلیم‌خان


تئلیم خان´ین 243 جو دوغوم ایلی ساوا´‌نین مره‌غئی کندینده قوتلاندی.

جمعه تیر آیی نین اوتوزوندا ساوا´‌نین مره‌غئی کندینده حکیم تئلیم‌خان´ین 243 جو دوغوم ایلی تورک شاعیر، یازارلار، و تئلیم‌خان´ین ماراقچی‌لاری و ها بئله شاهسون اوزانلاری طرفیندن قوتلاندی.

بو تؤره نده کی دوکتور گونئیلی، والی گؤزه‌تن، ائلشن اوریادلی، سید حیدر بیات، فتح الله ذوقی، مهندس امیری، عاشیق گونش، عاشیق محیط، عاشیق علی‌حسینی و باشقا آراشدیریجی، شاعیر یازارلار و هابئله مره‌غئی کندینین آغ ساققال‌لاری‌ حوضور وارلاريیدی، بختیار فرخ شاهسئوه ن شاعیری‌نین آپاریجیلیقيلا باشلاندی، سونرا سایین آراشدیجی حیدرباغی جنابلاری‌ قورآن کریمد‌ن نئچه آیه تلاوت ائدیب و آیه‌لرین تورکجه‌ ترجومه‌لرین ده تقدیم ائتدی. سونرا دوکتور گؤنئیلی قیسسا بیر چیخیشدا 1371 و 1372 جی ایل‌لرده قورولان تئلیم‌خان کونگره‌سین خاطیرلایاراق دئدی: بوندان بئله هر ایل تیر آیی‌نین سون پنج‌شنبه و جومعه‌سی هر ایل تئلیم خان´ین دوغوم گونو اولاراق قوتلاناجاقدیر و من بوتون بوردا اولان شاعیر ـ یازار و اوزان یولداشلارین ايذنی ایله و سؤزبیرلیيی ایله بو مراسیمی بو ایل اؤن ایل اولاراق باشلانماسینی ائعلام ائدیره‌م. دوکتور گؤنئیلی قاباق اون ایللرده کونگره‌یه قاتیلانلاری اؤزه لجه رحمتلی دوکتور کمالی، دوکتور زهتابی، دوکتور بیگدلی و... خاطیرلایاراق دئدی: او قیزیل نسیلد‌ن یالنیز دوکتور هیئت حیات قئیدینده‌دیرلر، سایین دوکتور هیئت بئیه ساغلیق آرزیلاییرام و اومورام کی گله ن ایل‌لرده بو تؤره‌نه قاتیلا بیله‌لر.

سونرا سلیمان نوراللهی اؤز تئلیم‌خان حاقدا یازدیغی شئعری تقدیم ائتدی:

ائی منیم آلینماز قالام تئلیم‌خان
گلمیشه م یانیندا قالام تئلیم‌خان

سونرا عاشیق گونش شاهسئوه ن شاعیری تئلیم‌خان´ین شئعرلرینده‌ن بیریسینی ايجرا ائتدی.

10 یاشیندا سید محمد موسوی «شهریار ائلیندنه م» آدلی شئعری ايجرا ائتدی. موسوی‌´نین گؤزه ل ايجراسی و شئعرده اولان دویغو- دوشونجه بوتون ائشیده‌نلری دویغولاندیردی.

سونرا مهندس امیری مره‌غئی‌لی گنج موحققيق چیخیش ائتدی، مهندس امیری بیر تئلیم‌خان´ین کندلیداشی اولاراق بوتون تؤره‌نه قاتیلانلاردان تشکكور ائله‌دی و آرتیردی: بیزیم ده آرزیمیز بودور کی بو تؤره‌ن هر ایل قورولا و بو کندین اهالیسی تؤره‌نی قورولانلارا ایش بیر‌لی‌یی اپارالار. امیری چیخیشی‌نین سونوندا تئلیم خان´ین شئعرلری‌نین ایکيسینی اوخودو.

سونرا عاشیق تقی محیط ساوا´‌دا‌ن تؤره‌نه قاتیلان عاشیق تئلیم‌خان´ین رومانتیک شئعرلریند‌ن نئچه‌سین شاهسئوه ن هاوالاریندا ایفا ائتدی. تقی محیط´ین گؤزه‌ل ايجراسی و باغین گؤزه‌ل هاواسی و باغدا اسه ن اسین بیر بیریله تاپشیریب تؤره‌نی بیر وصف ائدیلمه ز معنوی حالا آپارمیشدیر.

سونرا سید حیدر بیات چیخیش ائتدی. بیات ایلکده دوکتور گؤنئیلی‌نین تؤره‌نده حوضور تاپماسیندان تشكکور ائدیب دئدی: بو تؤره ن دئمه‌لی اون نئچه بوندان اؤنجه‌ده قورولوبدور و گؤزه‌ل‌لرین آخیرا قالمیشلاریندان بیریسی دوکتو گؤنئیلی به‌یین بوردا حوضور تاپماسی ایکی‌ تؤره‌نی بیربیرنه باغلایاراق ایکی نسلین رابيطه‌سی‌نین و ایسته ک‌لری‌نین کسیلمه‌مه‌سیند‌ن خبر وئریر. بیات «بو گون بیز بورداییق نئیه بوراداییق چون ایسته‌میشیک و ایسته‌یه‌جه‌ییک و آتالاریمیزین بوتون ایسته‌مه‌دیکلرین بیز ایسته‌یه‌جه‌ییک» دئیه، تئلیم‌خان حاقدا یازدیغی «تئلیم´‌سیزمیشه م» آددا بیر یازی اوخودو. بیات´ین اؤره ک ائویندن یازیب باغیرماسی هامینی آرزی ـ نیسگیل‌لی گؤزلری یاشارتدی.

سونرا قوم´دان گله ن شاهسئوه ن موسیقی اؤیره تیم ائوی نین باشقانی عاشیق حسین‌ علی‌حسینی تئلیم´ین شئعرلرین شاهسئوه ن و قاراقان هاوالاری اوزره گؤزه‌ل بیر شکیلده ایفا ائتدی.

سونرا ائلشن اوریادلی قوم´دا یاشایان اوریادلی شاعیر اؤز چیخیشیندا قاراقان، ساوا بؤلگه‌سینده یاشایان تورک خالقی‌نین ساده‌لیک و صمیميیتلرینه ايشاره ائدیب ،دئدی: من بورانین خالقیلا یاناشاندا هئچ اؤزگه‌لیک دویمارام. قوناق سئوه رلیک، دوزلوک و صداقت بوتون آذربایجان میللتی‌نین ایچینده بیردیر. اوریادلی نئچه ایل بوندان قاباق قاراقان بؤلگه‌سینده یازدیغی شئعری و هابئله «ساپاند و آند» شئعرینی ایفا ائتدی. اوریادلی‌نین شئعری‌نی اؤزلجه مره‌غئی اهالیسی منیمسه‌دیلر.

سونرا یئنی‌دن دوکتور گؤنئیلی چیخیش ائدیب و تئلیم‌خان´ین دیوانی نین رحتملی کمالی´‌نین تشببوثی ایله نئجه توپلانماسین و رحمتلی پروفئسور زئهتابی و ايسماعیل هادی و رحمتلی اکبر خان رززاقی´‌نین و ها بئله اؤز چکدیيی امکلری آچیقلایاراق دئدی: بیز البتته هله‌ده کمالی توپلادیغی دیوانین اله کئچیرمه‌سینده ال اوزمه‌میشیک، او دیواندا تئلیم‌خان´ین یئددی یوز قوشما، گرایلی، جناس و ... شئعری توپلانمیشدیر. گؤنئیلی ایندی‌ ده نئچه ـ نئچه اینسانلارین قوم´دا، ساوا´‌دا تئلیم´ین دیوانی‌نی یئنی د‌ن توپلانماسین خبر وئردی و اؤزه لجه بختیيار فرخ و مهندس امیری‌نین بو حاقدا چکدی‌یی زحمتلردن تشککور ائله‌دی.

سونرا فتح الله ذوقی ساوا´یا گیردیکده سلمان ساوه جی‌´نین شهرینه خوش گلیبسیز یازیسینا اشاره ائده ره‌ک دئدی: «ساوه‌جی‌´نین عکسینه اولاراق چوخلو ساوا´دا یاشایان خالق هر کیمسه تئلیم خان´دان بیر شئعر ازبردیر، اما نه‌دن اوره‌کلرده یاشایان تئلیم‌خان´ین آدی یوخ، سلمان ساوه جی´‌نین آدی اوردا چکیلیر، دؤولت 50 میلیون دولار تاجیکيستاندا رودکی‌´نین مزارینا ایران بئیتو‌المالیندان خرج ائدیر آمما بؤیوک تورک شاعیری تئلیم‌خان مزاری داشسیز ـ سیمگه‌سیز قالیر، ذوقی آرزیلادی کی گله ن ایللرده تورکمن خالقی‌نین مختومقولو فراغی مزارینا ییغیشدیقلاری کیمی تئلیم‌خان دا آذربایجانلیلار اؤزه لجه شاهسئوه ن‌لر طرفیندن قوتلانسین. سونرا ذوقی والی گؤزه‌تن´ین «هه» کیتابی‌نین اؤن سؤزونو اوخودولار.

تؤره‌نین سونوندا آذربایجان´ین آدلیم شاعیری والی گؤزه‌تن چیخش ائتدی. والی تئلیم‌خان´ین دونیا آکادئمیک سويیه‌سینده تانینماسینا، آنجاق اونون شئعرلرین آراشدیرماغا اللرده بیر دیوان اولمادان سؤز آچدی. والی بیز ایندی تئلیم‌خان´ی تاشکند، ايستانبول، باکی، کلن و... یایمالی‌دیق دئیه، بو ایشین اولماماسیندا هامینی و اؤزونو موقصصير تانیدی. والی سؤزونون سونوندا گوجلو ايجرالاریلا نئچه‌ د‌نه اؤز شئعرلریند‌ن اوخودولار. سوندا سید حیدر بیات تورکمن‌لر تئلیمه توتدوقلاری «بایرام» کیمی بیز ده بوگونو تئلیم بایرامی آدلاندیریریق دئیه، هامیدان گله ن ایل بوگون بو تؤره نه قاتیلماغا چاغیردی.

شاهسئوه ن شاعیری بختیار فرخ تؤره‌نی آپاریجیلیق ائده‌ره ک تئلیم‌خان´ین شئعرلرینده یئری کلدیکده شاهسئوه ن لهجه‌سینده اوخویوب و تؤره‌نی داها دا زنگین‌له دیردی.

تؤره‌ن بیتدیکد‌ن سونرا قوناقلار یئرلی قاتیلان‌لارلا بیرلیکده مره‌غئی کندی‌´نین مزارلیغیندا تئلیم‌خا´نین مزارینی زيیارت ائتدیلر.

ساوچی اوغلو

0 Comments:

Post a Comment

<< Home