اراک تورکلریندن اولان شهید محمدعلی مالک الرقابی, شریعتی'نین ائوینده یارالاندی و "موجاهید" آدییلا قورشونا دیزیلدی.

اکبر گنجی: یالانچی-قوندارما قهرمان!

یئردیییم نسنه لردن بیری یالاندیر
او بیری ایسه؛ گوچ قوللاناندیر

"قوتادغوبیلیک"

سئوگیلی قلمداشلار!

سایغی دگر گونئی آذربایجان اولوسال قورتولوش حرکتی یولجولاری!

دویدوغوما گؤره اکبر گنجی آدلی آپارتاید فارس رئژیمی نین اسکی قوللوقچولاریندان بیری؛ "ایران"دا سیاسال دوستاقیلارین سسینی دونیایا دویدورماق آماجییلا، خاریجده یاشایان "ایران"لیلاردان، سیمگه سل(سمبولیک) اولاراق، اوچ گون "بیرله شمیش میللتر تشکیلاتی" اؤنونده آجلیق گئره وی یاپماق چاغریسیندا بولونموشدور!

بو گون "ژورنالیست" آدییلا ؛ "باسین اؤزگورلوگو سیمگه سی!"نه دؤنوشدورولموش اکبر گنجی آدلی آدامین کیم اولوپ، گئچمیشده کیملره قوللوق ائتمیش، نه لر پاپدیغی، آرتیق "فارس اوپوزیسییونو"نو ماراقلاندیرماییر. ماراقلاندیرسا بئله: "گئچمیشده هره نین یاپدیغی یانلیشلیق لاری او دا یاپمیش، آنجاق ایندی یولونو رئژیمدن آییرمیش"، دییه اولدوقجا بوش، آلدادیجی و سورومسوز بیر سؤزو یینه له ییپ-دورورلار. صمد دئمیشکن بو"چوق بختیار" بلله ک سیزلرین "یوق بلله کلرینی" –بیر آز اولسا دا- قیشقیرتماق آماجییلا؛ یاشادیغیم بیر اولایین قیساجا آنلاتماسی نین یارارلی اولدوغونو سانیرام.

ایلک اؤنجه؛ اکبر گنجی نین یاپدیقلارینی، قورنازجاسینا اؤرت-باس ائده نلر، دوغال اولاراق آپارتاید فارس رئژیمی نین ده، 27 ایللیک آسیپ-کسمه لرینی، تئرورلارینی، سالدیریلارینی اؤنمسیز و کیچیک یانیلتی(خطا)لار دییه، گؤرمزلیکدن گله بیلیرلر. اویسا؛ اونلارین یاپدیقلاری نین دوغرو-دوزگون آدی "جنایت"دیر و باشقا هئچ بیر سؤزجوکله آنلاتیلاماز. گنجی(لر)ین کیرلی اللری مینلرجه ساوونماسیز؛ گرچک اؤزگورلوک سئور اینسانین قانینا بولاشمیشدیر. گنجی(لری) آریتیپ-تمیزه چیقارماغا چالیشان سؤزده " فارس اوپوزیسییون"و، بو گرچگی یاقشیجاسینا بیلمه لی دیر.

بیلیندیگی اوزه ره؛ اکبر گنجی، آپارتاید فارس رئژیمی نین "دئوریم قورویوجولاری" (سپاه-ی پاسداران) آدلی اؤرگوتون "ایدئولوژی بؤلومو"نون اؤگره تمنلریندن بیری و بو اؤرگوتون گیزلی، سالدیرغان-قودوز اؤبه ک(گوروپ)لریندن بیری نین ده باشچیلاریندان اولموشدور. 1980لردن باشلایاراق؛ گئریجی آپارتاید فارس رئژیمی، موخالیف لرینی آرادان قالدیرماق اوچون چوق ساییدا: "حزب الله"؛ "ثارالله"، "انصارالله" و... آدلی گیزلی-سیلاحلی اؤبه کلر یاراتدی. اکبر گنجی نین باشچیلیق ائتدیگی اؤبه ک، بونلاردان بیر ایدی. اونون اؤبه گی 29 خورداد 1360 دا(ژوئن1980) دوقتور علی شریعتی نین تهرانداکی ائوینده دوزه نله نن؛ "آنما گونو"نه زینجیر، دمیر دگه نک، پیچاق و گؤزیاشارتیجی گازلارلا سالدیریپ، تؤره نه قاتیلانلاری چوجوق، گنچ، یاشلی و قادین دئمه دن آجیماسیزجاسینا پیچاقلاییپ- یارالادیلار. بو یارالانالاردان بیری ده من ایدیم. پیچاقلا سیرتیمدان(بئل ایله کوره ک) یارالاندیقدان سونرا "امام خمینی" آدلاندیریلمیش خسته خانایا(اسکی آدی:هزار تخت-ی خواب) قالدیریلدیم. یوزلرجه یارالی بولونان بو خسته خانا "دئوریم قورویوجولاری" و اکبر گنجی نین سالدیرغان- قودوز اؤبه گی جه باسیلیپ، بیر چوقو ایسه؛ توتوقلاندیلار.

یارالانلارین بیر نئچه سی؛ جانلارینی آپارتاید فارس رئژیمی نین تئروروندان قورتاراماییپ، "30 خورداد کوچه یوروشو"نده بولوندوقلاری(بو یوروشه قاتیلدیقلاری) ایره لی سوروله رک، ایشکنجه لره اوغراییپ، یارغیسیز(محکمه سیز) قورشونا دیزیلدیلر.

بو گون فارسلارجا؛ "باسین اؤزگورلوگو اوغروندا ایگیت جه سینه دؤیوشن!" بیر "ژورنالیست!" کیمی دونیا قامو اویونا(افکار-ی عمومیه) یئدیردیلن بو "باسین قهرمانی!" دوننکی باسقینجی، ییرتیجی، سالدیرغان اؤبه کلرین ایدئولوگو و باشچیسی اولاراق، کیرلی اللری گرچک دئموکرات-اؤزگورلوک سئور مینلرجه اینسانین قانینا بولاشمیش اکبر گنجی آدلی" پاسدار-ژورنالیست" دیر. کیرلی گئچمیشینی گیزله تمک و بو کئز سؤز ده "فارس اوپوزیسیون"و آدلاندیریلمیش؛ گرچکده آذربایجان تورک اولوسونون قانینا سوسامیش؛ قاتی یاغیلاری نین سؤزجولوگونو یاپماقدادیر. دونن دوستاقلاری دوستاقی لردن آشدیریپ-داشدیران دوستاقچی؛ بو گون خاریجده؛ دوستاقلاری قورتارماق ایچین، ایرانلیلاری (فارسلاری) "آجلیق گئره وینه"چاغیریر!

بیلیندیگی کیمی "ایران" چوق اولوسلو بیر اؤلکه دیر. ایندیلیک بو اؤلکه ده یاشاماق زوروندا قالان یاساق دیللی؛ ایکینجی درجه لی یورتداش ساییلان، مینلرجه گرچک ژورنالیست بولونماقدادیر. بو گون آپارتاید فارس رئژیمینه قارشی ان اویغار(مدنی)، باریشجیل ساواشیم(موجادیله)، فارس اولمایان اولوسلارجا وئریلمکده دیر. آنادیللرینده یازیپ-اوخویوپ-یاییملاما کیمی ان ایلکین و دئموکراتیک حاقلارا یییه اولمایان بو اولوسلارین؛ اؤزه للیکله گونئی آذربایجانین، یوزلرجه ژورنالیستی اینانیلماز بیر دورومدا توستاقلاردا و سورگونده یاشاماقدادیرلار. آیریجا؛ دئموکراسی، اینسان حاقلاری و باسین اؤزگورلوگو اوغروندا ایگیت جه سینه دؤیوشن تورک، تورکمن، عرب، بلوچ و کورد ژورنالیستلری بولوندوغو بیر اؤلکه ده؛ اکبر گنجی کیمی اللری کیرلی بیریسینه، "آلتین قلم" اؤدولو وئریلمه سی، دوغرودان دا دوشونولمه لی دیر. آنجاق اونون کیرلی اللرینی؛ هئچ بیر اؤدول یویابیلمه یه جکدیر.گونوموزون موداسینا چئوریلمیش بو اؤدوللندیرمه لر داها دوغروسو؛ اوتانمادان اوجوز سیاست یاپان بیر سیرا آوروپا سیاستچی لری نین فارس رئژیمینی قوروما و اونونلا بیرلیکده، کندی ایقتصادی چیقارلارینی دا گوونجه آلتینا آلماقدان باشقا بیر شئی دئگیلدیر.

اکبر گنجی نی قورویانلار و اونو اؤدوللندیرنلرایسه، "ایران"دا یاشایان اولوسلارین "تاریخسل بلله ک"لرینه ایهانت ائده رک؛ آخیتیلان قانلاری بیر تورلو اونوتدورماغا چالیشیرلار بوشو-بوشونا. آیریجا؛ 29 خورداد "آنما تؤره نی" اولایلاریندا بولونانلاردان چوق ساییدا تانیق(شاهید) دا واردیر. اؤزه للیکله بیر نئچه سیندن آد چکمه یین آرتیق (گوونلیک باقیمیندان) بیر ساقینجاسی(مانعی) اولمادیغینی سانیرام.

منیم اسکی دوستلاریمدان احسان شریعتی؛ سوسن شریعتی، و سارا شریعتی(لر) ایندیلیک آد چکه بیله جگیم تانیقلاردان یالنیزجا بیر نئچه سیدیرلر. بونلارین بو گون؛ بیر تاخیم بللی سیاسال-دوشونسل ندنلره(مصلحتلره؟) گؤره سوسدوقلارینا باقمایاراق، اکبر گنجی نین کیم اولدوغونو و 29 خورداد دا نه لر یاپدیغینی چوق یاقشی بیلیرلر. اؤرنه گین: یارالانانلاردان بیری ده؛ اراک تورکلریندن اولان شهید محمدعلی مالک الرقابی(شاه دوستاقی لاریندان)، منیم اوستادیم ایدی. شریعتی نین ائوینده یارالاندی و "موجاهید" آدییلا قورشونا دیزیلدی.

دستایئفسکی بیر یازیسیندا؛ "روسیه بیر یانلیش آنلاما(سوء-ی تفاهم) دان باشقا بیر شئی دئگیلدیر"، دییه یازمیشدیر. بیزیم ایسه؛ یاشادیغیمیز "ایران"، اوسته لیک چیپلاق گؤزلریمیزین اؤنونده؛ سؤزده "فارس اوپوزیسییونو" ایله آپارتاید رئژیمی و بیرسیرا آوروپا اؤلکه لری سیاستچی لری نین(داها دوغروسو تاجیرلری نین) ایش بیرلیگی ایله یاپیلان یالانجی، قوندارما قهرمانلار دا هئچ اولماسا، بیر"یانلیش آنلاما" سونوجو اولسا گرک! سوقرات اؤنجه سی یونان فلسفه جیسی هئراکلیت دئمیشکن اونلار:" قانا بولاناراق آریندیرمایا چالیشیرلار کندیلرینی؛ چامورا باتمیش بیری نین آیاقلارینی چامورلو سویلا یوماسی کیمی ".

گونئی آذربایجان-تورک شاعیر-یازاری سلیمان اوغلو 4.7.2006