تئلیم´سیزمیشه م
سید حیدر بیات
اوچ قرندن سونرا تئلیم خان´دان یازماق عاشیق علسگر دئدیيی کیمی, «یازماماغی یازماغیندان یاخشیدیر». قیناما منی، تئلیمدن من نئیه یازیم،
یوخسا بو ائلین یازانلاری اؤلوب، اوزانلار دیلی‌نین ازبری تئلیم‌خان بیزیم ادبيیات تاریخلریمیزده، فاکولته‌لریمیزده، بیلیم‌یوردولاریمیزدا ندن بئله بیر حؤرمتسیزلیيه معروض قالیبدیر. بیلمیره‌م تئلیم دیری اولسایدی بونو دا «مئهری خانیم»ین گؤزونده‌ن گؤره‌جه‌ایدی:
«سن منی ائله‌دین ائلد‌ن اولوسدان»
بیلمیره‌م.
آنجاق بیلیره م تئلیمدن یازماق منه یارامیر.
تئلیم، تیلیم، دیلیم، دیلیم – دیلیم اولموش دیلیمده یازیب یاراتمیش خان.
آذربایجان´ین شرقی سینیرلاریندا دیلیمیزی قورویان آسلان!
چؤگور تئللرینه تانیش شاعیر،
ماهنی‌لاردا یاشایان،
دؤشدن دؤشه، دوداغدان ـ دوداغا، تئلد‌ن ـ تئله، سازدان سازا، سازدان سؤزه، یاشایان، بیزه چاتان تورکولردیر تئلیم.
دیوا‌نسیز امپراطور، دفترسیز شاعیر، چؤگورسوز اوزان‌دیر تئلیم.
مره‌غئی گدیکلرینده منی هایلاییر، گلدیم، گلدیم، گلدیم، تئلیم دده، دده تئلیم، سن دده م قورقود، سن...
کیملیک سیمگه‌سی، سن کیملیک ذیروه‌سی
سنه من نئیه های وئریم؟ تئلیم!
یوخسا بو ائلین های وئره‌نلری اؤلوبدورلر؟
یوخسا بو اؤلکه‌نین ائله بئش ـ آلتی شاعیری واردیر؟ فيردوسی، حافيظ، سعدی، عططار، خيیام و...
یوخسا سن بو اؤلکه‌نین شاعیری دئییلسن،
یوخسا شاهسئوه ن قیزلاری سنین آدینی ائشیتمه‌ییب‌لر،
یوخسا او قیزلار سنین سؤزـ ییرلارینلا ساچلارینی یئللرده اسدیرمه‌ییب‌لر بایراق کیمی هالایلاردا،
بورا بیر اوزان گتیرین
ییرسیزمیشام
قاراخانسیزمیشام
هالایسیزمیشام
چوگورسوزموشه م
لئیلاناسیزمیشام
تئلیم‌سیزمیشه م
دیلیم‌سیزمیشه م
های موسلمانلار!
تورکوسوزموشه م!
مزله‌قان چاییندا یئنه آخیرمی تورکولر؟
تئلیم کیمی گئده‌م اوردا بیر اووج تورکو ایچه م
«مزله‌قان چاییندان گؤتوردوم هاوا»
لئیلانا[1]
لئیلانا
لئـ
لا
نا
سیز
میـ
شا
م
--------------------------------------------------------------------------------
[1] لئیلانا: ساوه تورکلری‌نین لیریک هاوالاری
0 Comments:
Post a Comment
<< Home