Wednesday, February 21, 2007



ساوه لی بیر چاغداش تورک شاعیر تانیتیمی / مهندس اسدالله امیری

28 بهمن, 1385, 08:12
آد و سوی آد : حاج علی سیفی
آتاسی‌نین آدی : صادقعلی
دوغوم ایل:1339 (گونش ایلی)
دوغوم یئری: ساوا`نین مرغئی کندی
ایش : صادرات بانکی کارمندی

مدنی ایشلرینین سابيقه‌سی:

25 یاشدان شئعر دئمه‌ یه باشلاییب و ایلک شئعرینی فارسجا دئییب. آمما اوشاقلیق دؤوروندن تورک ادبیياتی، مخصوصن تئلیم خان`ین شئعرلری ایله تانیش اولموش. آتاسی رحمتلی صاديقعلی سیفی، بیر چوخ تئلیم خان`ین شئعرلریندن ازبر ایمیش و گؤزه ل سسی ایله اوخورموش. یاخین اوچ مین (3000) بئیت فارسجا شئعر (غزل ،مثنوی، طنز, و اينتيقاد) و 80 قطعه تورکجه شئعر (غزل و بئش-بئش) یازمیش کی هله‌لیک اونون بو شئعرلری توپلانمامیشدیر. رحمتلی علی کمالی تئلیم خان شئعرلری اوزره چالیشان زامان، اونلا امکداشلیق ائده رکن تورک شئعرینه ماراقلانیب و تورکجه شئعر دئمه‌ یه باشلاییب‌دیر.

آت اؤله ن

گؤیول قوشو گینه پروازه گلدی
اوچوب قوندو قرا میللر دؤشونه
چمنلر سبز-و بوستان گوللو دمساز
قونار بولبول کیمی گوللر دؤشونه

بولوت گلیب آت اؤله ‌نه یاغاندا
چایلار دولوب سئل‌لر جوشوب آخاندا
اوجه ‌لردن اوبالارا باخاندا
قارامیل دایانیر سئللر دؤشونه

آت اؤله ن`ین صفالی‌دیر باهاری
آخار سویو غم غوصصه نی آپاری
یاتاقدا چوپانلار سوت داش ناهاری
آچاللار سوفره ‌نی گوللر دؤشونه

حسرت واریم آت اؤله ن`ین یایینا
هاچان اولا بیر ده گؤزوم آیینا
سئیره چیخيم چشمه‌سینه چایینا
اسه باد-ي صبا چؤللر دؤشونه

خییال مرکبینی مینیب گزه نده
قلم حئیرت ائدیب هردم آزاندا
"علی" اؤلکه ‌میزین وصفین یازاندا
یازیلار سؤزلری ائللر دؤشونه

*****

آت اؤله ن : مرغئیی یاخینلیغیندا بیر اوبانین (یایلاق) آدیدیر.
اوجه : اوجا (مرغئی لهجه سینده)
اوبالار: اوسته آدی گئده ن یایلاغین اوچ اوباسی وار کی آدلاری بودور: آت اؤله ن، آسگین(آسگون)، و قیزیل قاش.
قارا میل : ائحتيمالن بیر داغ یا دوز آدیدیر.

گونئیلی قارداشیما

بحمدالله سعادت یار اولوبدور
بو بی جان جيسمه بیر دم جان گلیبدیر
گینه فصل-ي خزان دؤنموش بهاره
کویر-ي تشنه یه باران گلیبدیر
اوجالمیش چهچه-يي بولبول چمنده
جوشوب طبعیم غزل گویان گلیبدیر
صبا موژده آپار خان ائللریمه
یارالی دردینه درمان گلیبدیر
مرغئی کندینه دوردانه مئهمان
گونئیلی مرد-ي نوکته دان گلیبدیر
سیلئیدیم یوللاری موژگانیم ایله
بیلئیدیم گر کی یار اوردان گلیبدیر
بیلئیدیم کاش او یولدا جان قویایدیم
ائدیدیم جانیمی قوربان گلیبدیر
یقینن شهريیار-ي مولک-ي سؤزدن
تئلیم خان`ه قاصید یاردان گلیبدیر
سعادت یار اولوب ايقبال، همراه
گونئیلی سیزلره مئهمان گلیبدیر
قرا بختیم یاتیب غفلتده قالدی
اوره ک یاندی جیگه ردن قان گلیبدیر
سیزی گؤرمک منه قیسمت دئییلمیش
گؤزوم یاشی ائدیب طوغیان گلیبدیر
یوخوم بیر ذرره قصد-ي چاپلوسی
بو سؤز بیر نیک پينداردان گلیبدیر
خودا بیلسین اوره کدندی بو سؤزلر
دئمه بو سؤزلریی هاردان گلیبدیر
"علی" آدیمدی شٶهرت" سیفی"یه م من
تئلیم خان`ی سئوه ن‌لر طئیفی‌یه م من
ولی طنزده تخللوص موفليسه م من
گونئیلی جان سنه چوخ موخليصه م من

*****
بو شئعر تئلیم خان قورولتاییندا (30/4/85) ایشتیراک ائده ن دوکتور گونئیلی به‌یه ایتحاف اولوب.
مرغئی: شاعیرین و هابئله تئلیم خان`ین دوغما یوردو اولموش ، ساوا`نین بیر کندینین آدی.

دونیا

عجب دونیادی بو دونیا-يي فانی
گؤگه رتمه ز توپراغی توخم-ي وفانی
یئتیرمه ز کیمسه‌نی آخير ويصاله
توججوه ائیله بو اندک مجاله
قبول ائیله بو پندی ائیله مه لج
بو دیوارین بناسین قویما سن کج
او دیوارین کی آدی زيندگیدیر
کج اولسا حاصیلی شرمندگی‌دیر
عزیزیم راضی اول خیرالاموره
دولو شیرین نه چلله نمیش نه غوره
ائله بیچاره‌لردن دستگیری
غرور-ي وجه نین اولما اسیری
اینانما چون جوانسه ن چوخدو وقتین
قبول ائیله کی اصلن یوخدو وقتین
جاوانلیقدا او کس کی غافیل اولدو
اروج ایله نمازه کاهیل اولدو
گؤره ر بیر گون کی وقتی قورتاریب‌دیر
اؤزو داشیيله اؤز باشین یاریب‌دیر
"علی"نین بختی یاتدی غافیل اولدو
گئچیب بیهوده عؤمرو باطیل اولدو
———–

Labels:

0 Comments:

Post a Comment

<< Home