قوم ساوه عاشیق موحیطی ۴ / دوکتور علی قافقازیالی
۵ , ۱۳۸۶, ۰۰:۲۵
۵.۱۷. قوم-ساوه عاشیق موحیطي نين چاغداش عاشیقلاريندان بعضیلري:
۵.۱۷.۱. عاشیق علی رمضانی ((۱۹۵۵
عاشیق علی رمضانی ۱۹۵۵ ایلینده ساوه ده دونيايا گلمیشدیر. شاهسئون طايفاسينين يارجانلي تيره’سيندهندير. اؤنجه باباسيندان داها سونرا دا عاشیق محمد علی صوفولار’دان چؤگور درسي آلميش. عاشیق صوفولار’ين مجلسلرينه دوام ائدهرك تورک عاشیقلیق گلهنهیینی (سنتینی) ااؤیرهنميش، يئنه صوفولار’ين يولوندان گيدهره ک اوستاد تئلیمخانين شعرلریني و موحیطده بيلينهن خالق حيكايه لریني ااؤیرهنميش. ۱۹۸۶ ایلیندهن اعتبارن دویون درنکلرده عاشیق اولاراق ميدان آلماغا باشلامیشدیر. عسگری گؤرهوين دهن (سربازچیلیقدان) سونرا ترافيک پوليسي اولموش. ۱۵ ايل پولیسلیک ایله یاناشی عاشیقليغيني داوام ائتديرمیشدیر. داها سونرا پوليس ليکدهن آيريلاراق عاشیقلیق صنتيني داوام ائتديرمیشدیر.
عاشیق علی رمضانی شعرلرینده “گونش” تخلصونو قوللانماقدادير. ايکيسي قیز دؤرت اوشاغی واردير
.
عاشیق علی رمضانی عاشیقليغا باشلاديغي ۱۹۸۶ ایلیندهن بريدير قوم’دا ايقامت ائتمکدهدير.
۲۰ مارت ۲۰۰۶ گونو قوما گيتديکيمده ” تورک ادبیات اوتاغي” آدلي درنکده اونون ایله گؤروشدوم. ائرتهسي گون ائوينده وئرهجهیی کونسئره منی ده دعوت ائتدي. تورک ادبیات اوتاغينين باشقاني سید حیدر بيات، يارديمجیسي جلال ذولفيقاراوغلو، حمید زولفواوزون، شاعير سولئيمان نوراللهی و شاهسئون طايفاسينين ايرهلی گلنلري اورادايدي. عاشیق حسين علي حسيني ایله بيرلیکده بيزه موحتشئم بير چؤگور، تورکو، دیگر ضيافتي سوندو. شعر اوخوماسی، تورکولري يوروملاماسي و سازي چالماسي ایله اوستادليغيني اورتايا قويموشدو.
قوما داشيمادان اؤنجه ساوه’ده ” استریو تئلیمخان ” آدلي بير موزيک قئید ائوي قورموش، حسين علي حسيني ایله بيرلیکده ۱۹۰ کاسئت دولدورموشلار. قومـ’ا گلديیينده بو موزيک ائويني بيراخميش، قوم’دا ” استریو شباهنک (ائل سئوهن) ” موزيک ائويني قورموشلار. بورادا دا ایندیيه قدر ۷۰’دهن آرتیق کاسئت دولدورموشلار.
تهران راديوسونون ” فرهنگ مردم ” (خالق کولتورو) آدلي پروگرامينا سيخ سيخ قاتيلاراق عاشیقلیق گلهنهیی اورونلریني سونماقدادیر.
” خانه موسيقي تهران ” (تهران موزيک ائوي) و ” سرود و آهنگهاي انقلابی قم ”
(قوم دئوريم هاوالاري و شارقيلاري) درنهیی نين اویهسيدير.
عاشیق علی رمضانی’ني قوم-ساوه موحیطيندهکي شاهسون، ساوه، همدان، قاراقان، تورکمن، قاراپاپاق، آفشآر طايفالاري دعوت ائتدییی کیمی شهرييار، ساوج بولاق، بویون زهرا، آبگرم، قزوین، شیراز، فیروزآباد، حتی گنبد کاووس و مشهد كيمي مينلرجه کیلومتر اوزاقدا کی تورک طايفالاري دا دعوت ائتمکدهدير.
علی رمضانی’نين شعرلریندهن اؤرنکلر:
چؤگور
چؤگورويون چوخدو قدير قييمهتي،
آماندير قييمتين ائنديرمه عاشیق.
هامي يئرده واردي اونون حورمتي،
آماندي حورمتين سينديرما عاشیق
اوخوياندا سينه اوسته آلارسان،
عاريفلرین مجلسينده چالارسان،
چآلديخچا اونونلا دم ساز اولارسان،
آماندير اؤزوندهن اينجيتمه عاشیق.
قيزيل قييمتي وار گوموشه ساتما،
چؤگورويو هامي سازلارا قاتما،
چالماياندا تئللریني اويناتما،
آماندير تئللرین دينديرمه عاشیق
چؤگورسوز هر يئرده مجلسه گيرمه،
قديريني بيلمهيهنه دينديرمه،
دستامازسيز اونا الییی وورما،
آماندير حيکمهتين سينديرما عاشیق.
گونش دئيهر چؤگورو چکر نازیي،
او اولماسا گلمهز سنين آوازيي،
هامي يئرده اولار راز-ي همرازی
بو سيرري بير کيمه بيلديرمه عاشیق.
” آتا تورک ”
آنادان اولاندا قوچچاق اولموشوق
آديميزي قويدو بيزيم آتا، تورک!
دوشمنلر الیندهن ناچاق اولموشوق،
قويماز تورپاغينا دوشمن باتا، تورک!
ساواش گونو دوروپ مينر آتيني،
گئيديرهر اينينه آغ خالاتيني،
دوشمني گؤسترهر ااصلی ذاتيني،
او زامان کي اوخون ايستهر آتا، تورک!
توتوپ دوشمنلرین ياري جان ائيلر،
بير قان اولسا يئتميش ايکي قان ائيلر،
اولدوروب دوشمني هامي يان ائيلر
دوروب بير ده مينر اولسا آتا، تورک!
قوجا جاوان شرف غئیرت کانيندا،
هامي دوروبدولار بيربير يانيندا،
داعوا ميدانيندا ساواش گونوندا،
غيرت قبول ائتمهز توتوب ياتا، تورک!
چاغيرار قارداشین کؤمهگه گله،
دوشمنين قانيني دؤندهرهر سئله،
گونش دئيهر هامي وئره ال اله،
قانلاريني بيربيرينه قاتا، تورک!
ائلات باياتيلاري
بير قيز سئوديم کهلهون
داغلاري دولو گون
گل گل گؤتوروم قاچيم،
قوي اؤلسون سني سئوهن.
بير قيز سئوديم لکلردن
او ينئگي ايپکلردهن،
گل گل گؤتوروم قاچيم،
گؤ زلري چيچهکلردهن.
بير قيز سئوديم زهغهلدهن،
خینا گئتمهز آغ الدهن،
زهغهل ديلين قوروسون،
وئرمهيئيدين ازللدهن.
بير قيز سئوديم جالاللي
أغ اوزلو قوشا خاللي.
يوخسولا قيز وئرمهزلر،
دييهللر ايگيت ماللي.
بير قيز سئوديم سولدوز دان،
اوزو آغدير اولدوزدان،
گؤردوم سحردهن کوسوب،
دئديم نه گؤردون بيزدن؟
(بو طایفالار هامیسی قومدا یاشایان تورک یا باشقا طایفالارین آدی دیر. سولدوز ایسه قومدا بیر تورک طایفاسینین آدیدیر. بیات)
بير قيز سئوديم محمدلي،
ديلي شعرين حؤرمتلي،
گل اوتوراق ديز به ديز،
دانيشاق درتلی درتلی
بير قيز سئوديم يارجانلي،
دؤشو خوردا مهرجانلي،
سنه جانيم قورباندير،
مني گؤردو قيرجاندي.
بير قيز سئوديم موسولو
ساچي خئمسه فئسيلي
گئجه بيزيمنهن ياتير،
گوندوز اولور کوسولو.
بير قیز سئوديم زرگئردهن،
طوبا بوي مينا گردن،
دئدي سنه قيز وئرمهک،
گئت آل سن اؤزگهلردهن.
بير قيز سئوديم دئللر دهن،
ساچي قيزيل گوللردهن،
دئديم سني آپاريم،
قورتاريم بو ئللردهن.
بير قيز سئوديم کؤسهلر
آلديم اوزدهن بوسهلر،
دئدي سنه وئرمهزلر،
فاميللريم کوسهللر.
لوطفا بو یازی حاقدا نظریلرینیزی بیزه گؤندهرین:
akafkasyali@hotmail.com
heydarbayat@gmail.com
آردی اولاجاق.
قاباقکی بؤلوملر:
بیرینجی بؤلوم
ایکینجی بؤلوم
اوچونجو بؤلوم
———-
آلمایولو
www.hbayat.com
0 Comments:
Post a Comment
<< Home