ایل‌لر اؤنجه اراك شهرينده درس اوخودوغوم زامان قاراقانلي بير دوستوم وارايدي توركلوگه و توركلره چوخ تعصبو وارايدي
“مزه دده‌مي يانديردي” يازيسينا بير حاشيه / مهندس اسدالله امیری
۲۴ دوندوران, ۱۳۸۶, ۱۵:۰۸
ایل‌لر اؤنجه اراك شهرينده درس اوخودوغوم زامان قاراقانلي بير دوستوم وارايدي توركلوگه و توركلره چوخ تعصبو وارايدي و هر زامان توركلردن و اوزلليكله تبريزلي لردن تعريف ائدردي. نئچه آي اؤنجه اونون تلفون نومره‌سينی تاپيب بيله‌سيني آراييب دانيشاندان سونرا بيلديم كي او علاقه دن داها خبر يوخ. آمما من: او زامانلار بير ايرانلي كيمي دوشونوردوم و ايران(=فارس) ديليني عرب كلمه‌لردن آرينماق ايسته‌ينلردن ايديم و رامين،آرش و … بوكيمي آدلاردان خوشوم گلردي. من و دوستومون فرقي ايكي ديلي تانيماق و تانيمامادير. (اونون قورو تعصبو وارايدي و من تعصب سيز ايديم).
ايندي ده بيزيم ديلداشلاريميز ايستر تهران يا باشقا شهرلره كؤچن مهاجرلر ايستر دوغما يوردلاريندا قالانلارين بير قيسمينده فارسلاشما پروسه سي ايره‌لي سورمكده دير و منجه بو بير آنورمال وضعيت‌دير. چون بونلار هرايكي فرهنگ و ديلي (تورك و فارس) تانيمادان بئله داورانيرلار و بونلار اؤزلريني فارس ائتديكدن سونرا دا گؤرجكلر كي فارسلار بونلاري فارس يوخ، بير” فارس اولموش تورك” كيمي تانيياجاقلار. و اوندا داها هويتسيزليك له اوزلشه‌جك‌لر. (بير نفر آتاسينين گؤزون اويار(چيخاردار) كي بيله‌سينه دئسينلر كوراوغلو، آمما جماعت “كوراوغلو” يئرينه بيلسينه “كوركيشينين اوغلو” دئديلر). فرزاد صمدلي دئميشكن بونلارا بير ورق سمباده لازيمدير تا اصالتلريني (قیزیل اولمالارينی) پاخير و پاس آستيندان (آلتيندان) گؤستره‌لر.آنجاق آداملارين سمباده نومره‌لري فرقليدير.
بيزيم گؤره‌َويميز:
منجه بيز قارشي طرفلره باخمادان اؤز مدني ايشلريميزي گورمه‌لي‌ييك.
بيليريك كي هويت نئچه عنصر اوجومله‌دن:ديل، دين، تورپاق و … دن يارانير. ديل‌دن باشقا دين و مذهب ده بيزيم هويتيميزدير و منجه ديله مكملدير. بيز كيمليگيميزي دينيميزله ده قورويا بيلريك و بو ساحه ده بؤيوك آدام و شاعيرلريميز وار: منزوي، يحيوي، كلامي زنجاني، فكري، ساوالي حاج اكبرخان رزاقي (نئچه جيلد كيتابي رحمتليك دوكتور علي كمالي همتي ايله چاپ اولوبدور). آمما نه يازيق كي بيزيم دوستلار بو ساحه‌يه گيرمك دن چكينيرلر. حالبوكي من تهرانين تورك اولدوغونو هر زاماندان آرتيق محرم آييندا حس ائديرم. (بو سؤزون اثباتي اوچون محرم گئجه لرينده تهراندا عباسي ۴ يولوندا انصارالحسين مچيدينده حاج داود عليزاده‌نين مراسيمينه ساعات ۲ ياري گئجه باش ووروب و جمعيتي گورون). بونلاردان آيري نمونه ده گتيرمك اولار، مثلا اهوازداكي ديلداشلاريميز كيمليكلريني لشكرآباد ميدانيندا اولان “مسجد حجتيه آذربايجانيهاي اهواز “لا ساخلاييب و گؤستريرلر. (قيد ائتمه لي يم كي خوزستان دا مهاجر تورك لردن باشقا،يئرلي توركلرده وار كي اهواز شهرينده “كيان”منطقه سينده و شوش شهرينين اطرافيندا يئرلشيرلر).
تورپاق مسئله‌سينده ده بوردا منظوروموز منطقه‌اي هويت دير. و بيز بو قونودا دا ايشله‌نه‌جك چوخ ايشيميز وار. مثلا: ساوا شهرستانينين گورمه‌لي يئرلرين چوخوموز بيلميريك: قيز قلعه‌سي، قيرخ قيزلار بولاغي (كماللو كندينده)، شاه ميسليم(شاهزاده مسلم-قاراقان و نوبران بخشلري آراسينداكي داغدا)، نوح امام زاده سي (بالوقلو كندي) ، ارديمين قالاسي ،اينجي قارا داغي و ….و بير چوخ آيري يئرلر كي آللاه قويسا گلجك‌ده تانيتديراجاييق.
0 Comments:
Post a Comment
<< Home