ساوالي آشيق علي ولدخاني / اسدالله امیری
ساوالي آشيق علي ولدخاني / اسدالله امیری
۱۳۸۷
“گؤزوم قالدي گول بنيزده / اردبيل زنجان تبريزده”
دوغوم يئري و تاريخي: ساوانين نوواران بخشينين جوشقان(كوشگان) كندي- ۰۱ /۰۳/۱۳۵۷ (گونش ايلي).
قوم-ساوا آشيق محيطيندن، تيليم خان وورغون‌لاريندان اولان گنج آشيق، علي ولدخاني، اوشاقليقدان چؤگورله تانيش اولوب و بؤيوك قارداشينين چؤگورونو گيزليجه گؤتوروب چاليرميش. سونرالار اوستاد آشيق مسيح الله رضايي و غرق آباد(كرگاوا)لي آشيق سولطاندان دا درس آليبدير و ايندييه كيمي اوچ آلبوم ياييبدير: ۱- قوم-استريو خيام ۲- قوم- استريو عشاير ۳- كرج- استريو قدس، هابئله ۱۳۸۶ دا اراكدا قورولان “سفره هاي آسماني” مراسيمينه قاتيليب و حكيم تيليم خاندان بير شعر اوخويوب و او برنامه ايران تلويزيونونون ۳ونجو كاناليندان ياييملانيبدير. او مراسيمدن سونرا، بير ترافيك قضاسي نده ني ايله آشيق اؤلومدن قاييتدي. نئچه گون كُمادا قالان اشيق، آييلاندا ايلك دئديگي سوز بو: ” مسيح الله نو گتيريي گئديره م مَرَغئيده اوخويام”. بو حادثه دن سونرا تهرانا دعوت اولان علي ولدخاني، تهرانداكي مراسيمه قاتيلابيلمه دي.
بورادا ديرناق آراسي بير قونويا توخونماق ايسته ييره م و اودا بيزيم يوللاريميز مساله سيدير. رسمي سندلره گؤره ايلده ياخين ۲۷۰۰۰ نفر ايراندا ترافيك قضالاري نده ني ايله حياتلاريني ايتيريرلر كي تاسفله بيزيم ده بو یولدا ايتگينلريميز اولوبلار. بو مساله ني سانکی ايللر اؤنجه رحمتليك علي كمالي حس ائتميش و ساوانين قاراغان بؤلگه سينده يول چكمه یه باشلاميش كي همن بؤلگه نين، بندامير- بلوبند كندلرينين يولو علي كمالي امكلرينين محصولودور. آيريجا ايندي ايشله نمكده اولان: ساوا-همدان اتوباني و نوبران- كميجان يولونون ايشه باشلامالاريني آرزولاركن، سايين علي ولدخاني ايچين تانريدان كامل صحت و ساغليق ايسته ييرم.
آشيغين، ايران تورك ادبياتيندا ان چوخ سئودي‌یي آدلار بونلار: تيكمه داشلي خسته قاسيم- ساوالي حكيم تيليم خان- آشيق مسيح الله رضايي.
تيليم خانا حدسيز سایغی‌سی اولان آشيق، غريبدن، شاه اسماعيلدان، اصلي-كرم و كوراوغلوداندا اوخويور.
بير اوغول اوشاغين آتاسي اولان علي ولدخاني، بعضی سببلره گؤره اوغلونون آدینی “تیلیم خان” قویابیلمیر.
آشیق ولد خانی حكيم تيليم خانين ۴ و ۵ جي قورولتايلارينا قاتيليب و چيخيشي دا اولموشدور.
اوستاد عاشیق مسیح الله رضایی
۱۳۷۱، حکیم تیلیم خان ۲جی قورولتایی – ساوانین جوشقان کندی- رحمتلیک علی کمالی و حاج احمد ولدخانی 
بيزيم آشيق، اوستادينين امه‌یینی ايتيرمه ييب و هامي آشيقلاردان باش بيله ن اوستاد آشيق مسيح الله ي بئله دَيَرلنديرير.
( بوتون آشيقلاريميزا سايغيمي بيلديرركن):
ترلانلار گزر هاوادا
يئل ايله بولود داوادا
كاشاندا قومدا ساوادا
سنين كيمي آشيق يوخدور
باليق‌لار اوينار دنيزده
گؤزوم قالدي گول بنيزده
اردبيل زنجان تبريزده
سنين كيمي آشيق يوخدور
سؤزوي ساخلاما نهاندا
آشكار اولموشاي جهاندا
نه شيراز، نه اصفهاندا
سنين كيمي آشيق يوخدور
خيام سني سئودي توْيدا
هئچ آشيق اولماز بو بوْيدا
اورمودا سلماسدا خوْيدا
سنين كيمي آشيق يوخدور
0 Comments:
Post a Comment
<< Home