ندا آقا سلطان، گونئي آزه ربايجان`ين تفريش بؤلگه سي توركله رينده ندير

On Tue, 7/7/09, .... wrote:
From: ...
To: "mehran bahari"
Date: Tuesday, July 7, 2009, 2:47 AM

سايين باهارلي، نئدا حاقدا بو بيلگيله ري تقديم ائديره م:

بو عاييله تفريش شهه رينده ن كؤچموش آزه ربايجان توركودور. تئهراندا اؤله ن داود صدري آدلي دا توركدور و او دا تفريشده ن كؤچموش بير عاييله ده بؤيوموش. من بونلاين ياخين قوهوملاري ايله يولداشام.

سايقيلار

sayın baharlı neda haqda bu bilgilәri tәqdim edirem :

bu ayile tәfriş şәhәrindәn köşmüş azәrbaycan türküdürlәr. tehranda ölәn Davun sadri adlı da türkdür vә o da tәfrişdәn köşmüş bir ayilәdә böyümüş. mәn bunların yaxın qohumları ilә yoldaşam.

sayqılar

--- On Sat, 7/4/09, mehran bahari wrote:

From: mehran bahari
Subject: آداپ`ا اؤنه ري: ندا آقا سلطان، تئهران توركله ري، مير حسين موسوي، اكبر اعلمي و رفعت بيات
Date: Saturday, July 4, 2009, 6:05 PM

آداپ`ا اؤنه ري: ندا آقا سلطان، تئهران توركله ري، مير حسين موسوي، اكبر اعلمي و رفعت بيات

مئهران باهارلي

سؤزوموز

ايران`دا ياپيلان اونونجو جومهورباشخاني سئچگيله ري سوره جي سيراسيندا، بير كز داها بو اؤلكه ده ياشايانلارين اينسان حاقلاري دئوله ت طره فينده ن گؤبودجاسينا چئينه نميش و آياقلار آلتينا قويولموشدور. بونلارين چوخو ايسه باشارييلا دونيا قامو و اولوسلارآراسي اينسان حاقلاري و سيياسي مركه زله رينه يانسيميشدير.

تورك خالقي دا سون اينسان حاقلاري پوزونتولاريندان، دوغال اولاراق اؤز پاييني آلميشدير. آنجاق خالقيميزا ياپيلان اينسان ديشي داورانيشلار، گره يينجه ديش دونيايا و قامو اويونا يانسيتيلماميش و اولاشديريلماميشدير.

آداپ، بو اولايلارين بير نئچه سوموت اؤرنه ييي ايله ايلگيلي راپور و بيلديري يايينلاميشدير. بونلارين ان سونونجوسو، ايران دئوله تينين سيويلله ره قارشي شيدده تيني قينايان بيلديريدير.

آنجاق آداپ ايندييه جه ن، بوتون سئچگي سوره جينده تورك خالقينين اينسان حاقلاري پوزونتولاريني ايچه ره ن ييغجام بير راپور و يا بيلديري يايينلاماميش و اؤزه لليكله تورك خالقيني ياخيندان ايلگيله نديره ن و سيياسي آچيدان چوخ اؤنه ملي اولان بير نئچه قونو حاققيندا سوسموشدور. اؤرنه يين اكبر اعلمي، مير حسين موسوي، ندا آقا سلطان، تئهران توركله ري، ....بونا قارشين كورد قوروپلاري، بو اولايلار سيراسيندا كورد خالقينا، بير بوتون اولاراق ياپيلان حاقسيزليقلاري ايچه ره ن بير راپور حاضيرلاما ايشينه گيريشميشدير.

من آشاغيدا بو كيمي بير نئچه قونويا توخونموشام. بورادا وورقولاماق ايسته ديييم قونو، اينسان حاقلاري درنه ك و قوروملاريميزين، ايندييه ده ك اولدوغو كيمي و حتتا آرتاراق، ايراندا ياشايان بوتون تورك خالقيني، اونلارين ياشاديغي بؤلگه و اونلارلا اؤزله رينين منيمسه دييي سيياسي گؤروش و ايدئولوژيك باغليليقلارينا باخماقسيزين، اؤز سوروملولوق آلانلاري و قوروما آلتينا آلمالاري گره كديييدير. اينسان حاقلاري قوروملاريندا چاليشانلار، بير سيرا اينسانلارين اؤرنه يين اكبر اعلمي كيمي شخصييه تله رين، سيياسي گؤروشله ريني اويقون بولمايابيلير و يا اونلاري به يه نمه يه بيليرله ر. آنجاق بو، اونلارين ايران دئوله تينين اعلمي و اونون كيميله ره ياپديغي اينسان حاقلاري پوزونتولاري قاباغيندا سوسمالاريني و يا گؤرمه زده ن گلمه له ريني هئچ بير بيچيمده حاقلي قيلماز. يازيمين سونوندا، داها اؤنجه سؤزوموزده چيخان ايكي پاراقرافا يئر وئرميشه م. بو پاراقرافلاردا، تورك آزه ربايجان اينسان حاقلاري درنه ك و قوروملارينين اعلمي و موسوي`يه صاحيب چيخمالاري گره كدييي ايله ري سورولموشدور.

آداپ` اؤنه ري: ندا آقا سلطان، تئهران توركله ري، مير حسين موسوي و اكبر اعلمي

١-اكبر اعلمي: جومهورباشخانليغي آدايلاريندان و اؤز سؤيله مله رينده تورك-آزه ربايجان قونوسونا اؤزه ل وورقو ياپان اعلمي`نين يورتداشليق حاقلاري، ايران دئوله تي طره فينده ن گوبودجاسينا پوزولموشدور. بو دوغرولتودا اونون آدايليغي بيله ردد ائديلميشدير. آداپ ايندييه جه ن بو تورك و آزه ربايجانلي شخصييه تين اينسان حاقلارينين ايران دئوله تي طره فينده ن چئينه نمه سينه تپگي گؤسته رمه ميشدير.

٢- مير حسين موسوي: جومهورباشخاني آدايي و ميلليه تچه تورك اولان آزه ربايجانلي مير حسين موسوي، اونونجو جومهورباشخانليغي سئچيمله ري سيراسي و اوندان سونرا پاتلاق وئره ن اولايلاردا، ايراندا ايصلاحات ايسته يه ن خالقين - ايسته مه يه ره ك- اؤنده رليييني اوستله نميشدير. سئچگي چاليشمالاري سيراسيندا اؤزونون تورك و آزه ربايجانلي اولدوغونا وورقو ياپان ميرحسين موسوي`نين دئوله تين ياپديغي ساختاكارليقلار سونوجوندا، اينسان و يورتداش حاقلاري گوبودجاسينا پوزولموشدور. دونيا قامو اويو و سيياسي مركه زله ري طره فينده ن مير حسين موسوي`نين دؤنه دؤنه تورك و آزه ربايجانلي اولدوغونون آلتي چيزيلمه سينه رغمه ن، آداپ ايندييه جه ن بو تورك و آزه ربايجانلي شخصييه تين اينسان حاقلارينين دئوله ت طرفه فينده ن چئينه نمه سينه تپگي گؤسته رمه ميشدير.

٣-ندا آقا سلطان: ايران ايسلام جومهورييه تي، باشكند تئهراندا خالقين دينج و اويقار ائعتيراضلاريني تئرور اسديريب، گره كسيز و آشيري گوج قوللاناراق ياتيرماق ايسته دييي سيرالاردا اؤلدوروله ن سوچسوز اينسانلاردان بيري ده ندا آقا سلطان آديندا بير قيزدير. بوتون دونيادا ايزله نه ن ندا آقا سولطان`نين اؤلوم آني، خالقين دئموكراسي و اؤزگورلوك ايسته يينين سمبولونا چئوريلميشدير. گله ن سون خبه ر و دويورولارا اساسه ن ندا آقا سلطان ميللييه تجه تورك`دور. بو دويورو دوغرولانيرسا، اونون دورومو دا ايراندا ياشايان تورك خالقينين اينسان حاقلارينين ايران ايسلام دئوله تي طره فينده ن آياقلار آلتينا آلينماسي چرچيوه سينده، تورك-آزه ربايجان اينسان حاقلاري راپورلاريندا اله آلينمالي، حتتا اؤزه ل بير راپور و باشليق آلتيندا اينجه له نمه لي و دونيا قامو اويونا بيلديريلمه ليدير

٤-سئچگي چاليشمالاري سيراسيندا ياخالانلار و اؤلدوروله نله ر: سئچگي چاليشمالاري سيراسيندا تورك شهه رله رينده چوخ ساييدا اينسان ياخالانميش، تضييقله رله قارشيلاشميش و حتتا اؤلدورولموشدور. ياخالانانلار آراسيندا عليرضا فرشي، ائشي سيما ديدار و ييرمييه ياخين همدان بيلي يوردو اؤيره نجيسي، اورمودا ياخالانان يئددي دين طلبه سي و اؤلدوروله نله ر آراسيندا اورمو`دا ايكي گنج ساييلابيله ر. بوتون بو اؤرنه كله رين ييغجام و آيرينتيلي بير ديزيني آدي گئچه ن راپوردا اؤز يئريني آلماليدير.

٥-آدايلارين سيتادلاريندا ياخالانان آيدين، ژورناليست، آكتيويستله ر: سئچگيده ن سونرا باش وئره ن اولايلاردا، موسوي و كروبي سيتادلاريندا چاليشان چوخ ساييدا سيياسي آكتيويست، آيدين، ژورناليست و .... دئوله ت طره فينده ن ياخالانميشدير. بونلاردان آزه ربايجاندا ياخالانانلارين هاميسي و باشكند تئهراندا ياخالانلارين اؤنه ملي بير بؤلومو (كروبي سيتاديندان تقي رحماني، ...) تورك`دور. بو اوزده ن ده بونلارين حاقلاريني قوروما و سسله ريني دونيا قامو اويونا اولاشديرما، تورك-آزه ربايجان اينسان حاقلاري درنه كله رينين ايلگي و سوروملولوق آلانينا گيرمه كده دير.

٦-تئهران توركله ري: سئچگي سونراسي خالق آياقلانماسينين مركه زي، باشكند اولان تئهران`دير. بيليندييي كيمي تئهران ياري تورك-ياري فارس بير شهه ردير و آزه ربايجانلا فارسيستان`ين كسيشدييي بير بؤلگه ده يئرله شمه كده دير. قايناقلارين چوخو، بو شهه ر اهاليسينين ان آز ياريسينين تورك اولدوغونو سؤيله يير. دولاييسي ايله ايران ايسلام جومهورييه تينين بو شهه رده اسديردييي تئرور هاواسي، ايسته ر ايسته مه ز و دوغال اولاراق بوتون تورك خالقي و آزه ربايجاني ماراقلانديرديغي كيمي، تورك آزه ربايجان اينسان حاقلاري درنه ك و قوروملاريني دا ايلگيله نديرمه ليدير. اؤزه لليكله اونوتولماماليدير كي بو شهه رده دينج گؤسته ري حاقلاري پوزولانلار، ائوله رينه بسيج ميليسله ري طره فينده ن باسقين ياپيلانلار، ياخالانانلار، دؤيوله نله ر و حتتا ندا آقا سلطان اؤرنه يينده اولدوغو كيمي اؤلدوروله نله رين اؤنه ملي بير بؤلومو تورك خالقينا منسوب اولان اينسانلاردير

٧-رفعت بيات: اونونجو جومهورباشخانليغي سئچگيله ري سيراسيندا، اوچ قادين دا آداي اولموشدور. بونلاردان رفعت بيات، آزه ربايجان`ين زنگان (زنجان)شهه رينين ايسلام شورا مجليسينده اسكي ميلله ت وكيلي ايدي. اونون آدايليغي، بو شخصين آشيري دينچي و فارسلاشميش اولماسينا رغمه ن، اؤته كي قادينلار كيمي، "شوراي نگهبان" طره فينده ن و صيرف قادين اولدوغو اوچون ردد ائديلميشدير. رفعت بيات اؤرنه يي، ايران ايسلام جومهورييه تينين تورك و آزه ربايجانلي قادينلارينين اينسان و يوردتداشليق حاقلاريني سيستئماتيك اولاراق پوزماسينين يئني بير اؤرنه ييدير. بو اوزده ن ده تورك و آزه ربايجانلي سيياسي قوروپلار طره فينده ن تبليغات آراجي و اينسان حاقلاري درنه كله ري طره فينده ن ده اونلارين گؤره و و سوروملولوقلارينا گيردييي اوچون ده يه رله نديريلمه ليدير.

٨-يوخاريدا سيرالانانلارا داها بير نئچه باشليق آرتيريلابيله ر. منيم وئرديكله ريمسه، تكجه بير اؤرنه ك ليست اولوشدورماق آماجي ايله وئريلميشدير.

سايقليلاريملا
مئهران باهارلي

------------ --------- -------

آزه ربايجان اينسان حاقلاري درنه كله ري اعلمي`يه صاحيب چيخماليديرلار

اعلمي`نين ايران`ين گنه ل سورونلاري و آزه ربايجان`ين دورومو حاققيندا سؤيله ديكله ري، اونون چوخ ياخين بير گله جه كده ايران دئوله تي طرفينده ن آغير بير شكيلده تضييقله ره معروض قالاجاغيني كسينله شديرميشدير. اعلمي اؤز سئچيم چاليشمالاري سيراسيندا ولايت فقيه`ي سورقولاميش، ايران ايسلام جومهورييه تي يؤنه تيجيله ريني ٢٠٠ كيشيليك بير مافيا آدلانديرميش، آناياسانين رئفئراندوما قويولماسيني ايسته ميش، ايران ايسلام جومهورييه تينين سولدوزدا ياپديقلاريني ايسراييل`ين غززه ده ياپديقلارينا بنزه تميش و .... شوبهه سيز اؤزونو يارالانميش حيسس ائده ن ايران دئوله تي، اعلمي`ني بو سؤيله ديكله رينده ن دولايي جزاسيز بيراخماياجاقدير. نئجه كي اينقيلاب محكه مه سي اعلمي`ني اورمودا ياپديغي ايلك سؤيله وي سيراسيندا محكمه يه چاغيرميشدير. اعلمي ايسته سه، ايسته مه سه آرتيق ايران دئوله تينين گؤزونده بير "پان توركيست"دير.

بو دورومدا تورك آزه ربايجان ميللي دئموكراتيك حره كه تي و اؤزه لليكله اينسان حاقلاري درنه كله رينين اعلمي`يه صاحيب چيخماسي، اونا قارشي اولان ميللي بورجلاريدير. آزه ربايجان اينسان حاقلاري درنه كله ري اعلمي`نين ردد ائديلمه سيني و ايران دئوله تينين اونا ياپديغي و ياپاجاغي باسقيلاري، گئجيكمه ده ن يئتگيلي و ايلگيلي مركه ز و قوروملارا چاتديرماليديرلار. اونوتولماماليدير كي - بير سيرا بيلگيسيز و دار گؤروشلو آزه ربايجانليلارين اعلمي`يه قارشي يوروتدوكله ري شخصييه ت تئرورو و قارالاما كامپانياسينا باخماقسيزين- اعلمي`نين ردد ائديلمه سينين اساس دليلي، اونون تورك خالقي و آزه ربايجان`ين آدايي اولماسي ايدي. دولاييسي ايله بوندان سونرا ايران دئوله تينين اعلمي به يه ياپاجاغي باسقيلار، تورك خالقي و گونئي آزه ربايجان`ا قارشي ياپيلان باسقيلار اولاراق گؤرولمه لي و ائله جه ده دونيا قامو اويونا يانسيتيلماليدير.

------------ --------- ------

موسوي`نين تورك اولماسي، خاريجي مئدييادا فارس شووئنيسمينه قارشي قوللانيلماليدير

موسوي دين دئوله تي و ويلايه ت-ي فقيه`ه اينانان، و فارسچي- پان ايرانيست ائييليمله ري اولان بير شخصييه تدير. آرتي، او گرچه ك بير ايصلاح طله ب ده دئييلدير. بوتون وئريله ر، اونون آزه ربايجان و تورك خالقينا اوز گتيرمه سينين –اعلمي`نين ترسينه- بير سئچيم تاكتييي اولدوغونو گؤسته رير. دئمه لي او تورك خالقي گؤزونده "ميللي" بير شخصييه ت دئييلدير. بونا رغمه ن، ايليملي و ارده ملي موسوي ايله آشيري و ايلكه ل احمدي نژاد آراسيندا، دين دئوله تي و ويلايه ت-ي فقيه`ده ن نه آنلاديقلاري آراسيندا اولدوغو كيمي، يؤنته م و اوسلوب آچيسيندان دا جيددي فرقله ر واردير. موسوي-احمدي نژاد" و حتتا "موسوي-خامنه اي" چاتيشما و چكيشمه سينه گلينجه، بو چكيشمه له رده موسوي، داها ايليملي و دئموكراتراق اولان طره فدير. بو اوزده ن ده موسوي، باتي دونياسي و ديش مئدييادا رغبه ت و به يه ني ايله قارشيلانير.

فارس شووئنيسمينين منيمه سه دييي بير يؤنته م واردير: اونلار اولوملو يؤنله ري اولان تورك شخصييه تله رين (اؤرنه يين مصدق)، تورك اولدوغونو قامو اويوندان گيزله ده رله ر. آنجاق اولومسوز و منفي يؤنو بولونان بير تورك وارسا (اؤرنه يين خلخالي)، دؤنه دؤنه و اوستونه باسا باسا بو شخصين تورك اولدوغونو وورقولارلار. بونو ياپماقدان آماجلاري ايسه، تورك كيمليييني آشاغيلاماق و تورك گنجليييني اؤز ميللي كيملييينده ن اوتانديرماقدير. فارسلارين اولوملو يؤنو بولونان بير توركون (اؤرنه يين شيرين عبادي`نين) توركلويونو ذيكر ائده نده ده آماجلاري، بو شخصين اؤزونو ايرانلي بيلديييني، دولاييسي ايله ايران توركله رينين ايران ميلله تينده ن اولدوغونو و باغيمسيز ميللي كيمليكله رينين اولماديغيني گؤسته رمه كدير.

عئيني دوغرولتودا سون اولايلار سيراسيندا موسوي`نين تورك و آزه ربايجانلي اولماسي گرچه يي بير سيرا فارس ديللي ايرانچي-سراسه ريچي مئدييا (اؤرنه يين مانقورت توركله ره عاييد اولان ايران امروز سايتي، ...) طره فينده ن سيخ سيخ گونده مه گتيريلير. ايرانچي-سراسه ريچيله رين بو تبليغاتلاردان آماجي، ايران توركله رينين باغيمسيز بير ميللي وارليق اولاراق حره كه ت ائتمه سيني انگه ل.له مه ك و اونلاري موسوي اؤرنه يينده اولدوغو كيمي ايران، ايران اولايلاري و ايران ميلله تينه ياماماقدير. آنجاق موسوي-احمدي نژاد`ين قارشي قارشييا گلمه سي، حتتا موسوي-خامنه اي چاتيشماسي، ايران توركله رينه فارس شووئنيسمينين بو سينسي پيلانلاريني بوشا چيخارتمايا ايمكان يارادير.

سئچيم سوره جينده ديش مئدييادا، ايران ايسلام جومهورييه تينين ايچه ريده ن چاتلاماسينا نده ن اولان ايليملي و دئموكرات موسوي`نين تورك و آزه ربايجانلي اولدوغو گرچه يي وورقولانميشدير. بيز ايسته سه ك ده، ايسته مه سه ك ده، موسوي بوگون ايران ايسلام جومهورييه تينين تمه ل.له ريني سارسان بير شخصييه ته چئوريلميشدير. بو، خاريجي تبليغاتدا بيزيم فارس شووئنيسمينه قارشي قوللانماميز گره كه ن بير نوكته دير. اؤزه لليكله ديش مئدييايا خطابه ن ياپيلان يايينلار و تبليغاتلاردا، موسوي`نين تورك اولوشونو چكينمه ده ن قوللانماليييق. بيز تورك موسوي`نين باش قالديريسيني دونيايا، تورك خالقينين فارس ايران ايسلام جومهورييه تيني قبول ائتمه دييي و فارسلاردان آيري ياپي و داورانيشلارا ماليك اولدوغو دييه سونمالي و موسوي كيمي تورك كؤكه نلي دينچيله رين بيله، فارس مودئللي شيعي ايسلام و ايران ايسلام جومهورييه تي ايله سورونلو اولدوقلارينا وورقو ياپماليييق. ايران ايسلام جومهورييه تينين تپه سينده اورتايا چيخان بو چاتيشماني تورك كؤكه نلي-آزه ربايجانلي ايليملي دينچي موسوي`نين، فارس كؤكه نلي-فارسيستانلي آشيري دينچي احمدي نژاد و حتتا فارسلاشميش ياري تورك اولان خامنه اي ايله چاتيشماسي اولاراق گؤسته ريلمه سينده ده يارار واردير. بوتون بو تبليغاتدان آماجيميز ايسه، ديش دونيايا ايراندا ياشايان تورك خالقينين، بو اؤلكه نين اويقار، چاغداش و اينسانجيل اوزو اولدوغو و ايران`ين گله جه يي سؤز قونوسو اولاندا باتي دونياسي طره فينده ن موخاطه ب آلينماسي گره كدييي فيكريني آشيلاماقدير.

گرچه يه هو