رحمتلیک دوکتور علی کمالی دن بیر شعر
به به عجب بسله دی مكتب قرآن سنی
قابل فيض ائيله دی قدرت ايمان سنی
مام وطن سسلدی گل گؤزل اوغلان سنی
دين مبين ايسته دی قوچ قوزی قربان سنی
الده مسلسل تفنگ بئلده قطار فشنگ
باشدا نوار سه رنگ عازم ميدان جنگ
خصمه ائدن عرصه تنگ نخبه گردان و هنگ
اكبره بنزر قشنگ ائيله دی دوران سنی
يازدی چيچكلر نه خوش تازه ديلر ترديلر
چيخدِی گونش لاله لر گوللرينی سرديلر
اما رضا جان سنی غنچه ایكن درديلر
سينسين الی گلچنين ائتدی پريشان سنی
گئتدی بالام گلمه دی داخی نئجه يوخلارام
خسته هجرانيام هر گئجه سايوخلارام
هر ايگيده گؤز تیكيب هرگولو من قوخلارام
بلكه تاپام قوخلويام بيرده رضا جان سنی
اؤلسم آجيندان اگر من قانيوی ساتمارام
قانيوه قان ائتمه سم راحت اولوب ياتمارام
قتليوه باعثلری اؤزگلره قاتمارام
دونيا ييیه ن لر ائديب قانيوه غلطان سنی
بيلمرم الله نئجه چخدی بالامين جانی
جانی چخنده نئجه گؤردو بو پيس دونيانی
قانلی گؤزونن نئجه گؤزله دی هر بير يانی
سؤيله نه مدت گئچيب تا آپاريب قان سنی
جام شهادت ايچيب وئردی رضا جانینی
حقدی كه بيز دولاياك ايندی اونون قانینی
ائتدی كمالی قلم تك تك مژگاننی
جوهر ائديب گؤز قانين اوخشادی الان سنی
قایناق: http://meserghan.blogfa.com/
0 Comments:
Post a Comment
<< Home